كتب محمد عوض الشافعي :
طبعا كلنا عارفين برنامج من سيربح المليون اللى كان بيقدمه جورج قرداحى .
البرنامج ده برنامج عالمى اتقدم بنسخ كتير كانت اول نسخه منه وهو البرنامج الاصلى اتقدم على شبكة ITV البريطانية عام 1998 وكان اول مقدم للبرنامج هو المذيع البريطانى الشهير كريس تارنت .
فى 2001 كان هناك مهندس عسكرى فى الجيش البريطانى اسمه تشارلز انغرام اللى صورته هو زوجته مرفقه بالبوست كان ظابط مهندس وباحث عسكرى حصل على العديد من الاوسمه والانواط العسكريه وهو جالس فى منزله دخلت عليه زوجته تخبره انها ربحت 32 الف جنيه استرلينى فى برنامج من سيربح المليون .
طبعا صديقنا حس ان فيه حاجة غريبة مسك مراته وقعد يقرر فيها وعرف منها الموضوع .
الموضوع بإختصار ان زوجته مدام ديانا اتفقت مع شخص اسمه وينتوك
ووينتوك ده الصراحة مش عارف درجة قرابته بديانا ايه؟ هل كان اخوها ام مجرد صديق لان المصادر اللى ذكرت القصه دي ما اتفقتش على درجة القرابة .
ووينتوك ده الصراحة مش عارف درجة قرابته بديانا ايه؟ هل كان اخوها ام مجرد صديق لان المصادر اللى ذكرت القصه دي ما اتفقتش على درجة القرابة .
المهم اتفقت مع وينتوك ان واحد فيهم يروح يقدم فى مسابقة من سيربح المليون والتاني يقف فى مقاعد الجمهور وعند طرح الاسئلة يقوم التانى بمساعدة المتسابق على اختيار الاجابه الصحيحة عن طريق العطس .
يعنى الاجابة رقم واحد تبقى كحه الاجابة رقم 2 كحتين وهلم جرا .وانها قدرت تكسب وينتوك 32 الف باوند وهى بردوا كسبت ال32 الف باوند في المرة اللي بعدها .
طبعا تشارلز أول ما عرف الموضوع ثار جامد على زوجته وقعد يفكرها بشرفه العسكرى وانه قد ايه خدم بريطانيا العظمى باخلاص وان الغش والخداع لا يمكن يسكت عنه , وجه علشان يمسك التليفون علشان يبلغ الشرطة زوجته مسكت ايديه وقالتله
أيه رأيك تيجى تقدم ونساعدك انك تكسب فى المسابقة وبدل ما هنبقى اتنين فى المشاركة فى حل الاسئلة نبقى تلاته انت فى البرنامج وانا ووينتوك فى مقاعد المتفرجين .
قعد يهرش فى دماغه كده راحت ديانا قالتلته قدم انت فى المسابقه ولو كسبت هتكون ديه اخر مره ومش هنكررها تانى .
بتفكرنى باللى بيحصل فى الافلام المصريه اللى بتكلم عن تهريب المخدرات اللى المهرب فيها بيكون ناوى انها تكون اخر عمليه تهريب . بس للاسف البوليس بيقبض عليه .
المهم تشارلز الفلوس زغللت عينيه وفى 9 ستمبر 2001 قرر التقدم للمسابقة ووصل للمسابقة النهائية ونجح بمساعدة زوجته ديانا ووينتك فى انه يجاوب على ال15 سؤال بنجاح ويكسب المليون باوند استرلينى حوالى 24 مليون جنيه بالمصري .
وطبعا لما المذيع كريس تارنت اعلن ان تشارلز انغرام نجح فى انه يجاوب ال15 سؤال ويكسب المليون باوند تشرلز وديانا زوجته قعدوا يمثلوا انهم مصدومين ومش مصدقين نفسهم انهم قدروا يكسبوا المليون جنيه استرلينى .
ولان الحرام مبيدومش ومصير الفلوس الحلال ترجع لاصحابها تشاء الاقدار ان الخديعة تكشف لاتفه سبب .
طبعا الاغلبيه العظمى من حلقات برنامج من سيربح المليون بتكون مسجله . وفى اثناء اعداد الحلقه للعرض فى التليفيزيون لاحظ مهندس المونتاج صوت عطسات بتكون اثناء اختيار تشارلز للاجابات فقام بعمليات فنيه لتوضيح صوت تلك العطسات واكتشف ان عدد العطسات دائما هى الاجابه الصحيحه .
طبعا بلغ المخرج والجهه المنتجه اللى وقفت تسلم المليون باوند لتشارلز . واتقدم تشارلز وزوجته ديانا ومعاهم وينتك للمحاكمه اللى حكمت بحبسهم سنتين وتم الافراج عنهم بعد سنه وثلاث شهور لحسن السير و السلوك واتغرموا 115 الف باوند واتغرم وينتك 15 الف باوند .
وطبعا مكنتش ديه نهاية الفاجعه لتشارلز الجيش البريطانى قام بعد صدور الحكم على تشارلز انغرام بفصله من الجيش وايقاف كافة مستحقاته وراتبه .
بعد خروج تشارلز وديانا من السجن ساءت الاحوال الماليه للزوجين وانتهى بالحال بيهم انهم يبيعوا مشغولات فضيه زى بتوع السبح اللى بنلاقيهم ادام الجوامع ساعة صلاة الجمعه .
----
بقلم
محمد عوض الشافعي
بقلم
محمد عوض الشافعي
